توجيهات هامة لطلاب الصف الثالث الاعدادي
بس هو طبعا علشان اقتراحات لتنظيم الوقت .. ده له عوامل كتيره ...
مثلا هتروح المدرسه بانتظام و لا لأ
و هتاخد دروس و لا لأ ؟
لكن بصفه عامه هقول لحضرتك....
اللغه العربيه الدنيا فيها حلوه... النحو محتاج تدريب كتيييير جدا
الدراسات الاجتماعيه طويله محتاجه حفظ كتير سواء التاريخ أو الجغرافيا
نهتم بالتواريخ و الخرائط
العلوم لذيذه... ندرب عليها كويس
اللغه الانجليزيه تعتبر أسهل ماده مافيش فيها اى تعقيد
الجبر محتاج حل كتيييير
الهندسه طويله شويتين خصوصا في التيرم الثانى.. محتاجه تدريب كتييير علشان نجمع كل الأفكار و بالتالى نحل بسرعه ... علشان زمن الإمتحان
الدين نحاول كل اسبوع نذاكر منه فصل و كذلك السوره القرآنيه علشان ما نتزنقش آخر كل تيرم
و برده الحاسب الآلي كل اسبوع نذاكر منه شويه
و برده اللغه الثانيه ...ده لو فيه حسب كل مدرسه
و نحمد ربنا ان اللغه الثانيه و الحاسب الآلي و التربيه الفنيه مواد خارج المجموع ... لكن لابد من النجاح فيهم...
أهم حاجه بأه فى كل ده...
اننا نحاول نكون سابقين في المناهج كلها
و نحاول نخلص مذاكرة المناهج كلها قبل الامتحانات بفتره كافيه لا تقل عن ٣ اسابيع....
ليه ؟
علشان فى الفتره دى و اللى هى اعتبرها اهم فتره.... نحل امتحانات كتيير جدا على كل المواد
المفروض لا اقل عن ١٥ محافظه فى كل ماده إن لم يكن اكتر من كده
كمان علشان احتمال وارد نحب نراجع حاجه او نسمع حاجه او نأكد على حاجه ...
ناكل كويس و ننام كويس ده مهم جدا
كل يوم اكون ذاكرت ٣ مواد
حاجه كمان مهمه جدا
قبل الامتحانات بحوالى شهر كده نتابع جريدة الجمهوريه و جريدة الوفد و خصوصا الجمهوريه
ليه ..؟
بينزل مع الجرايد دى ملحق تعليمي قبل الإمتحانات
بتيجى منها اسئله كتييير
حابب اقول لحضراتكم كمية الاسئله اللى فى الجرايد دى بتكون كميه وهميه
صعب جدا على أولادنا إنهم يحلوا كل الأسئله دى خصوصا أيام الإمتحانات الوقت بيكون ضيق لكن....
مالا يدرك كله لا يترك كله...
نستعين بالله العلي العظيم قبل كل شيء و بعد كل شئ
نتحلى بالهدوء و بدون شد أعصاب لا من الأهل و لا من الطلبه ....
نقول دعاء المذاكره و كذلك بعد المذاكره نختم بدعاء
ياريت نبدأ كل يوم بشئ من القرآن الكريم
يستحسن ننام فى نص اليوم ساعه او ساعه و نص... حسب قدرات و طاقة كل واحد
نوفر الهدوء و جو المذاكره المناسب للطلبه ... من حيث الإضاءه و التغذيه و عدد ساعات المذاكره و النوم و الراحه البدنيه و الذهنيه بصفة عامة
مافيش مانع كل يوم خميس من كل اسبوع ناخد ساعتين ثلاثه راحة و ترفيه ...
تعليقات
إرسال تعليق